About The AVB

Un tiki di historia di nos futbol

Na aña 1909 Gerard de Veer, es tempo un conocido comerciante a mira un portret di un bala di futbol den un buki di catalog y a manda busca esaki pa su dos jiu hombernan Eddy y Geffy. E mes un aña aki Dominee Ds. Gerrit J. Eybers a funda hunto cu e rumannan de Veer y e otro hobennan di Playa (Oranjestad) e prome club di futbol. E nomber cu nan a scohe pa e club tawata Aruba Voetbal Vereniging, popularmente conoci como A.V.V. E tereno cu nan a haya pa traha e prome veld di futbol riba nos isla tawata na unda awendia ta situa nos corte di hustisia, esta panort di Emanstraat y pabou di Hendrikstraat. Como cu e tereno aki tawata yen di mata di kwihi, tuna y cadushi e hobennan hunto cu Dominee Eybers mester a traha duro pa por a kita tur esakinan.Un ingles cu tawata traha como boekhouder na e compania di guano Aruba Phosfaat Maatschappij na Seroe Colorado tawata yudanan cu trainmento y e reglanan di wega. Como cu e prome añanan no tawata tin mas club a dicidi pa parti A.V.V. den dos team, un blauw y un corra pa hunga contra otro. E Fraternan di Tilburg, cu a cuminsa duna les na school di mucha hombernan na 1915 tambe a yuda den e desaroyo di nos futbol. Na mas o menos 1920 of 1921 a wordo funda e prome bond pa futbol. E nomber ni e dirigentenan di e bond aki no ta conoci. E bond aki a organisa e prome campeonato na 1921 y Wilhelmina a bira e prome club campeon di nos isla. E siguiente aña a wordo funda e club Vitesse cu durante añanan 20 lo bira e club mas popular di nos isla y cu tawata hopi biaha campeon. Na 1924 a tuma lugar e prome wega interinsular ora cu Sparta di Curacao a bin nos isla pa hunga contra Vitesse. Cu binida di Lago y mas despues e refinerianan Eagle y PanAm futbol a cuminsa plama riba nos isla y na 1927 nos ta haya e prome club pafo di Playa y besindario, esta na Sabaneta cu tawata yama Roozendaal y mas despues a bini Trappers na Santa Cruz y tambe na Noord clubnan a wordo lanta. Na April 1930 e seleccion di Aruba a bishita Curacao pa prome biaha. Tres luna despues e team di Lago a hunga e prome wega internacional na Maracaibo, Venezuela. E mesun aña aki na Oktober a wordo funda un bond nobo cu a haya e nomber di Aruba Voetbal Bond y Dr. J.R. (Coco) Arends a bira e prome presidente. Captain Rodger, e presidente di Lago a pone un “shield” (escudo) como premio pa e club campeon. E siguiente aña A.V.B. a organisa su prome campeonato y Hollandia a titula campeon. Na fin di e aña aki e “Equipo Brondi” di Peru a bira e prome club stranhero pa bin hunga na nos isla. Pa por a obtene un pida tereno pa traha un sportpark A.V.B. mester a wordo funda oficialmente y esaki a sosode dia 29 di Januari 1932. Na Oktober 1933 e seleccion di Curacao a bishita Aruba pa prome biaha pa hunga dos wega na apertura di Wilhelmina Sport Park. Na December di e aña aki Aruba Juniors a bira e prome club pa bai hunga na Curacao. Na 1934 Aruba a haya bishita di Bonaire, Surinam, Dos Caminos di Caracas y Deportivo Independiente di Santa Marta, Colombia y tambe Hercules di Corsow. Na 1935 Aruba a haci su prome gira pa Curacao, Surinam y Trinidad. Despues di a perde varios biaha contra Curacao, Aruba a logra su prome empate na 1937. Na 1939 e seleccion di nos isla a gana e campeon di Costa Rica “Orion FC” cu a bishita nos isla, cu score di 4-1 pero A.V.B. mes a keda cu apenas 4 club como miembro. Es mesun aña aki a cuminsa e di Dos Guerra Mundial na Europa pero nos isla mes a wordo involvi ora cu Alemania a invadi Hulanda na Mei 1940. Durante e cinco añanan di guerra, apesar di e atake riba Lago y tambe “blackout” futbol a bira masha popular riba nos isla pero masha poco club tawata miembro di A.V.B. Na 1944 Aruba pa prome biaha a logra un victoria contra Curacao. Na 1946 3 hungador di Aruba participa cu Curacao na e Weganan Centro Americano y del Caribe na Barranquilla, Colombia. Na 1947 a wordo eligi un presidente y un directiva nobo cu a reorganisa A.V.B. y ya na e campeonato di e aña ey a participa 17 club. Na November di e aña aki tawata tin inauguracion di e luznan na e tereno di Lago Heights cu a bira e prome veld pafo di Lago Colony pa haya luz artificial. Na 1951 Wilhelmina Sport Park a wordo basha abou y na April 1952 a wordo inaugura e stadion nobo cu a haya e nomber di Wilhelmina Stadion. E mesun aña aki 7 hungador di Aruba a participa den e seleccion di Antiyas cu a hunga den e Weganan Olimpico na Helsinki, Finlandia. Na 1955 Aruba a participa pa prome biaha den e campeonato Centro Americano y di Caribe di Futbol na Honduras. Na 1957 Aruba a gana y tabla cu Haiti cu a caba di gana e campeonato aki (CCCF) na Curacao. Na 1960 Aruba, reforsa cu tres hungador di Curacao, a representa Antiyas na e campeonato di CCCF na Habana, Cuba y a sali sub-campeon. E mesun aña aki tawata tin e prome campeonato di futbol di Antiyas, miho conoci como Copa Antiyano. Na 1965 R.C.A. a bira e prome club di Aruba pa gana Copa Antiyano. Na 1970 Estrella tambe a gana e copa aki. Na 1986 Aruba a haya su Status Aparte y na 1988 a wordo accepta como miembro di F.I.F.A. Na 1994 tawata tin apertura di e stadion nobo cu a haya e nomber di Compleho Deportivo Guillermo P. Trinidad. Na 1996 Aruba a hunga su prome wega di cualificacion pa un mundial contra Republica Dominicana y na 2000 Aruba a gana su prome wega di cualificacion contra Puerto Rico. Na  2005 tawata tin apertura di Compleho Deportivo Frans Figaroa na Noord.