Campeonato Dedica Na Juan “Juju” Rasmijn Y Aubrey Maduro – Campeonato Division Honor 17-18 A Cuminsa Cu Desfile Di Lifida

Diabierna 13 di october den Compleho Deportivo Guillermo Trinidad, tabatin e apertura di e campeonato di futbol division honor 2017-2018. E anochi a cuminsa cu un desfile di e teamnan di Lifida kendenan tabata acompaña p’e grupo di brassband Massive.E teamnan RCA y SV Caiquetio a subi tereno hunto cu e teamnan di Lifida pa canta e Himno Nacional di Aruba. E publico presente a disfruta di Massive Brassband sperando e prome wega di e campeonato. Na final di anochi e team di Solito, RCA, a piki e prome 3 punto y esaki ta pone un presion riba Caiquetio.

Secretario di Comite Olimpico Arubano (COA), Nicole Hoevertsz, a hiba palabra e anochi aki dunando pabien na tur team p’e desfile bunita y a duna palabra di sosten n’e muchanan pa sigui haci deporte. Presidente di Arubaanse Voetbal Bond (AVB), Ing. Richard Dijkhoff tambe a hiba palabra, unda cu el a desea tur team exito p’e campeonato. Tambe el a recorda tur hende pa hunto sigui engrandece futbol.

E aña aki AVB a opta pa haci e apertura diferente unda cu a cuminsa cu Lifida U-5 te cu Division Honor. E clubnan tabata presente, pero tambe personanan importante pa cu e campeonato aki. E aña aki AVB a scoge pa dedica e campeonato na 2 persona hopi conoci den e mundo di futbol, esta Juan “Juju” Rasmijn y Aubrey Maduro. E anochi aki, Richard Dijkhoff hunto cu miembronan di directiva di AVB a entrega Juju Rasmijn un plakkaat unda cu a reconoce su persona. Aubrey Maduro no por tabata presente e anochi aki pa motibo cu e no ta na Aruba.

E prome wega di e campeonato tabata entre sub campeon di e campeonato anterior, SV RCA contra SV Caiquetio. Pa cu e wega mes AVB a mira e fanaticada di ambos team, unda cu Caiquetio y RCA a bin cu fanaticada grandi. Esaki lo tin di haber cu e decision cu e directiva di AVB a tuma e aña aki, unda cu nan a duna e entrada/e porta n’e clubnan. Richard Dijkhoff a sigui indica cu awo ta e clubnan tin e responsabilidad pa yega na nan fanaticonan.

SV Caiquetio a subi pa division honor despues di basta aña a topa nan prome wega contra di RCA cual tabata un wega basta balansa. Awo e campeonato a cuminsa y tin un trayectorio largo pa bay, pasobra AVB ta organisa 1600 wega pa campeonato y no solamente Division Honor, pero tambe e campeonato di Lifida a cuminsa den fin di siman. Desde awo te cu otro aña na Juli lo tin weganan di futbol.

Leave a Reply