Presidente Di AVB, Ing. Richard Dijkhoff A Hunga Mas Di 1600 Wega Di Futbol Durante Campeonato 2016-17

Na ocasion di apertura di e campeonato 2017-18

“Pa mi ta un honor grandi pa ta para boso dilanti awe pa duna inicio na un otro campeonato nacional, e biaha aki t’esun di Division di Honor 2017- 2018.

Mi ta bisa honor, pasobra no ta mas cu algun siman pasa, cu mi tabatin e honor di conta cu un sosten mayoritario di clubnan di futbol di Aruba, pa mi sigui dirigi Arubaanse Voetbal Bond pa 4 aña mas.

Mi ta priminti Boso cu lo mi dedica mas tempo, mas energia, mas dedicacion y aplica mi experencia y conocemento pa hiba futbol n’e nivel mas halto cu nunca antes nos a conoce”, asina Ing. Richard Dijkhoff, Presidente di Arubaanse Voetbal Bond (AVB) a bisa den su discurso diabierna anochi, na apertura di e campeonato Division di Honor 2017-18 den Stadion Guillermo P. Trinidad.

Pa haci esey, e organisacion ta conta cu un ekipo, no solamente den directiva di AVB, pero tambe rond di dje, cu ta conseh’e y acesora nan pa tuma e miho decisionnan, semper cu futbol central.

E intencion ta pa, den e siguiente lunanan, atrae profesionalnan pa sigui eleva e nivel di futbol. AVB ta pasando di ta un organisacion di boluntarionan, pa un organisacion profesional.

“Mi ta masha orguyoso di bisa cu tanto CONCACAF como FIFA ta dunando nos un bon man den esaki”, di acuerdo cu Richard Dijkhoff.

Papiando di e organisacionnan internacional, Aruba e ultimo añanan a traha duro pa mehora nos nomber na e nivel ey.

Nos ta orguyoso di anuncia cu nos ta masha bon mira den Caribe cerca CONCACAF, na Hulanda cerca KNVB y na mundo cu FIFA.

Tur e organisacionnan aki ta brindando nos apoyo, tanto financiero, pero tambe cu conocemento.

“Pa loke ta futbol na Aruba, mi por bisa cu ultimo aña, e deporte rey a luci den gran forma.

E campeonato 2016-2017 a produci no menos cu 1600 wega, entre tur e liganan, di mucha te veterano, den cual tin mas o menos 3 mil futbolista.

Cu orguyo mi por bisa cu futbol ta e deporte mas practica na Aruba y tambe na mundo.

Futbol no ta solamente un deporte pa competi, pa anota gol, pero tambe e ta promove disciplina, union, ta uni clubnan y paisnan”, asina Richard Dijkhoff a duna di conoce.

Resumiendo, e Presidente recien reeligi di AVB a dirigi su mes na tur presente den stadion. “Mientras cu FIFA y CONCACAF ta determina pa sigui aporta cu Aruba, mientras cu AVB ta determina pa sigui profesionalisa e organisacion, mientras e clubnan ta determina pa sigui train y gana, nos mester e mesun determinacion aki di Bo, como fanatico, pa sigui sostene Bo ekipo preferi. Con bo por sostene? Dor di bin wega, apoya y promove bo team”.

Na final, Richard Dijkhoff a bisa “Pa awor, sin papia mucho mas awo, mi kier desea tur 10 team tur clase di exito. Ban traha hunto pa sigui desaroya nos futbol y mantene como nos deporte Rey!”

Facebook Comments