Player Profile

Mylene Croes

Britannia Midfielder

Nationality :Dutch
Date Of Birth :17 march 1994
Height :1.60 m
Weight :64 kg

Mylene ta bin in di un famia hopi uni. Un tata y un mama cu semper a zorg bon pa su dos yuinan. Mylene ta e yui mas chikito, hunto u su ruman muhe (Ghislaine) y su mama (Brenda) nan ta biba den un humilde hogar na Piedra Plat. Mylene su tata Buchi (q.e.p.d) tabata un gran fanatico di e ekipo di S.V. Estrella y tambe a practica e deporte di Softball/Baseball. Tempo Buchi tawata na bida, ela sostene Mylene den su pasion pa futbol, conhuntamente cu su mama (Brenda). Mylene su lema semper ta: “Nunca no baha cabes riba tereno, semper cara na laira.”

Mylene a caba basisschool Mon Plasir y a sigui pa EPB Hato cual tambe ela finalisa. Despues di a finalisa EPB ela sigui cu su estudio na Hulanda. Aya ela sigui su MBO verzorgende cual e termina exitosomente. Mylene a milita na Hulanda den e ekipo di Laakkwartier y tambe a participa den ekipo di Aruba All Star, durante e torneo cu tur aña ta tuma lugar na Amsterdam den luna di juni.

Mylene a regresa bek Aruba despues cu su tata Buchi (q.e.p.d.) a fayece y a cuminsa hunga pa su ekipo faborito, esta Britanna Damas. Actualmente Mylene ta hasiendo su estudio na EPI pa finalisa un pida di su estudio cu falta.

Di chikito ora Mylene tawata bai skol e ta practica futbol. Apesar cu futbol ta un deporte domina pa e sera masculino, Mylene ta conciente cu e hende muhernan ta mas tribi awendia y p’esey e ta sinti’e masha orguyoso di por ta un bon hungador di futbol. Mylenne tin asina talento ya cu apenas 12 aña di edad e a titula campeon di futbol na Mon Plaisir basisschool. Despues e ekipo di skol aki a haya e oportunidad pa hunga na Boneiro. Ora Mylene a regresa Aruba bek, Mildred Wever a acerc’e y a puntr’e pa bin hunga pa un ekipo di futbol damas, mirando su potencial y talento. Tambe Mildred a splic’e cu pa hunga pa seleccion di Aruba, e mester ta milita den un ekipo di futbol. Di momento ey Mylene a dicidi cu elo bai hunga pa S.V. Britannia cual actualmente e ta hunga  y lo keda haci esaki te dia cu su condicion fysico duna. Mylene ta su curason ta Britannia Damas y tambe ta considera Britannia como su cas.

Por ultimo, Mylenne ta subraya cu e deporte di futbol ta den su sanger y mescos cu su omo grandi (cu tempo tawata na bida) a milita den Britannia, Mylene tambe a scoge Britannia como su ekipo pa bida.