Pa 6 siman largo lo prepara refereenan nobo pa fluit wega

E campeonato di futbol division honor 2017-2018 a inicia diabierna anochi y pa cu esaki semper tin referee, kendenan ta esunnan encarga pa dirigi e weganan. Pero pa esaki Arubaanse Voetbal Bond (AVB) durante henter e aña tabata planeando diferente cursonan pa instructor, coach y refereenan. AVB a haci e curso di referee pa asina por haya mas persona cu ta interesa pa forma parti di e mundo di futbol, pero den e caso aki como un referee.

Weganan no por tuma luga sin presencia di un referee, pa cu esaki AVB kier duna cursonan pa refereenan cu nan haya transcurso di e lunanan di e campeonato pa asina nan por fluit wega riba nivel. Hopi hende no sa pero pa aña AVB ta organisa 1600 wega pa campeonato, asina Presidente di AVB, Ing. Richard Dijkhoff a expresa. Federacion ta organisa hopi wega y pa cu esaki mester di refereenan y esey ta e motibo cu ta organisa e cursonan aki pero tambe pa haya mas referee pa haci uzo di nan durante e cantidad di wega cu ta tuma luga.

Casi tur dia lo bay tin wega y mas referee tin, mas miho por dirigi e weganan, asina Richard Dijkhoff a elabora. Asina aki por tin competencianan di nivel hopi mas halto, pasobra hopi biaha referee por tende cu hende ta bisa cu e nivel di futbol ta abou. Pero si tin refereenan riba un nivel halto y esaki ta haci cu e por guia e weganan den un bon forma. Por ilustra esaki den e nivel di e weganan na momento cu tin bon referee. Esaki ta e intencion di AVB, unda cu lo tin mas curso di esaki. Na e momentonan aki AVB ta papiando cu KNVB y CONCACAF pa introduci un academia di referee na Aruba, pero den e lunanan padilanti lo sigui amplia riba esaki.

E curso di referee a inicia diabierna y e curso aki ta e enseñansa basico di referee. Head of Referee Oslin “Oshi” Kock a indica cu tur referee a cuminsa cu e parti aki. E curso aki lo dura 6 siman pero unda cu ta 3 dia den fin di siman. Cada siman e lesnan lo ta di diabierna pa diadomingo, unda cu diabierna lo duna les den sala mientras cu diadomingo lo ta riba veld na Yara. E certificado aki ta duna e participante un base pa asina e por sigui te bira un referee di AVB. Na veld no por yega pone un hende y fluit wega, Oshi Kock a expresa.

E curso aki ta bon hinca den otro cu despues tin hende tin e oportunidad pa sigui bay dilanti y bira referee di AVB mes. Tin cierto rekisitonan cu nan mester sa y e comision di referee ta analisa esaki. “Tur esunnan cu kier bini y kier sa e regla, ta cuminsa cu e curso basico”, asina Oshi Kock a expresa. Despues di e curso e Head of Referee lo analisa y lo acerca e participantenan pa sigui cu e siguiente step. Durante e campeonato aki lo bay bin hopi cambio, unda cu esunnan cu a participa den e curso caba tambe lo ta den e weganan.

 

Leave a Reply