FIFA lo sostene AVB financieramente si Gobierno pasa un stadion pa nan
Tres representante diFédération Internationale de Football Association (FIFA) tabata na Aruba pa reuni cu Arubaanse Voetbal Bond (AVB) y Gobierno. E reunion cu AVB y Gobierno tabata ameno, unda a papia riba e plan strategico.
Presidente di FIFA ta proyecta pa tin futbol den e scolnan y pa FIFA e reunion a bay bon. Minister tabata entusiasma y a mustra di ta sostene e proyecto di AVB pa desaroya futbol na scol. E proyecto di FIFA ta pa trece futbol den scolnan y si FIFA firma e MoU cu Gobierno y AVB, Aruba lo ta e prome pais den Caribe pa logra esaki. FIFA ta den un discusion pa promove futbol na scol den region di Caribe. FIFA a haci e proyecto aki na Albania y a bay bon. E proyecto aki ta importante, pasobra e “grass root” regular ta imperativo pa desaroya futbol unda e muchanan ta. E no ta solamente importante pa clubnan, pero tambe pa sociedad.
E programa aki ta duna oportunidad den Caribe pa desaroya futbol y esey ta loke AVB ta haci. Ta planea futbol na scol, ta planea strategia nobo den futbol. Esaki tin e sosten di FIFA, kiermen ta bayendo den e direccion corecto. Veron Mosengo-Omba, Director di Desaroyo pa Africa y Caribe na FIFA, a expresa cu FIFA ta duna cada miembro e oportunidad pa desaroya futbol.
FIFA so no por desaroya futbol pero mester di e colaboracion di Gobierno. Esaki ta bin pasobra un parti ta di FIFA pero di otro banda global e ta un asunto di sociedad y p’esey mester di e colaboracion di Gobierno. Durante e reunion cu Minister di deporte, a papia riba e parti pa duna AVB lease di stadion. El a sigui indica cu si duna AVB e lease di 20 pa 30 aña, FIFA lo sostene e federacion unda lo mehora e facilidad pa haci uzo durante training y hopi mas. Presidente di AVB, ing. Richard Dijkhoff, ta trahando riba e proyecto aki y ta contando cu e sosten di FIFA.
Marlon Glean, Manager regional di FIFA, tabata contento cu e bishita na federacion di AVB y kico tur nan a logra cu e tiki recursonan cu nan tin. A mira e desaroyo di wega, di cual a mira e resultado di e wega di CONCACAF Nations League. FIFA a reuni cu AVB riba e parti administrativo, team tecnico unda a mira e metanan cortico y largo. Tambe a papia riba e parti con FIFA por duna su sosten na e federacion pa sigui e desaroyo di futbol na Aruba.
E representantenan di FIFA a keda impresiona cu e plan strategico di 2018-2022. FIFA a pidi paisnan den Caribe pa nan plan strategico y AVB ta e prome cu a entrega esaki, di cual a mira kico tur mester pa yuda e federacion. E reunion cu gobierno tabata pa promove futbol na scolnan basico y na mes momento pa sigura un facilidad cu e federacion por uza como un centro tecnico. Ta spera cu asina aki lo tin un luga pa tene weganan internacional na Aruba mes y na luga cu mester bay hunga na Corsou. Pa Marlon Glean e encuentro aki tabata exitoso cu reunionnan constructivo. FIFA ta satisfecho cu tur loke ing. Richard Dijkhoff y AVB ta haciendo na Aruba.
