Diabierna awor, dia 13 di october 2017, lo inicia e campeonato nacional di division di honor di nos deporte rey, futbol. Arubaanse Voetbal Bond (AVB) ta masha orguyoso di anuncia cu 10 ekipo a inscribi p’e campeonato aki, di cual e prome rond ta cuminsa diabierna awo y lo termina dia 10 di december 2017. Ekiponan cu lo hunga contra otro den e prome rond aki ta: SV RCA, SV Caiquetio, Deportivo Nacional, SV Riverplate, SV Bubali, SV La Fama, SV Caravel, SV Britannia, SV Estrella y SV Dakota. Tur wega ta riba diabierna, diasabra y diadomingo y den principio tur ta tuma lugar den Stadion Guillermo P. Trinidad na Dakota, sperando pa keda cla cu algun adaptacion na Compleho Deportivo Frans Figaroa na Noord.Ora esey ta cla, lo hunga e weganan den e dos stadionnan aki, dunando publico mas opcion unda pa mira e weganan.“Nos tabatin un tremendo campeonato 2016-2017 y mi expectativanan ta p’esun aki ta miho cu aña pasa. AVB hunto cu e clubnan ta canando un trayectorio di profesionalisacion y adaptacion, pa garantisa mas calidad di wega y hungadonan miho prepara, cu tecnica moderno, capaz pa hunga na Aruba of den nos region”, asina ing. Richard Dijkhoff, Presidente di AVB a duna di conoce. Separa di e clubnan, AVB a haci inversionnan grandi den amplia su oficina na Shaba, pa por tin un ekipo profesional pa organisa, dirigi y supervisa weganan di futbol na Aruba. Tambe ta invertiendo den nos refereenan, den Match Officials, den e coachnan di teamnan y asina por menciona. “Mi por bisa cu hopi orguyo, cu despues di hopi trabou y contacto internacional, awendia KNVB di Hulanda, CONCACAF y FIFA, tur tin hopi wowo riba Aruba y ta dunando nos un man den e trayecto pa hisa nivel di futbol en general riba nos isla. No solamente cu placa, pero tambe cu ekipo y conocemento”, asina Richard Dijkhoff a splica cu un sonrisa di orguyo riba su cara.Pa awor, ta invita comunidad amante di futbol, pa yega stadion pa sostene y apoya nos futbolistanan di e 10 ekiponan competiendo n’e nivel mas halto posibel di futbol, buscando e trofeo di campeon.
A funda Arubaanse Voetbal Bond (AVB) na aña 1932 y a afilia na CONCACAF na aña 1986 y despues na FIFA na aña 1988. E ta e organisacion cu ta maneha futbol amateur riba nos isla, incluyendo muchanan, hoben, hende muhe y adultonan. Nan ta responsabel pa sanciona e torneonan di futbol organisa tur liganan, pues di e liga infantil te cu Division di Honor. E oficina di AVB ta situa den Compleho Deportivo Frans Figaroa na Noord.