David Abdul awor ta coordinador di AVB Academy

ORANJESTAD: Drentando un era nobo Arubaanse Voetbal Bond (AVB) ta introduciendo diferente cambio positivo. Un di e introducion nobo nan ta haciendo e conocido ex futbolista professional David Abdul parti di AVB. Cu un trayectoria bastante largo den e mundo di futbol e biaha aki el a ricibi e oportunidad di bira coordinador di e academia di AVB, pa cual el a keda masha contento pa e oportunidad y honor.

David Abdul ta un persona cu a crece den e mundo di futbol y te na ultimo tabata coach di SV Dakota. El a hunga como futbolista professional na Hulanda pa e equipo di Sparta Rotterdam. Tambe el a forma parti di Aruba su seleccion den pasado. Na su regreso pa Aruba David Abdul a entrena varios team di futbol y logra varios titulo. Cu su experensia den academia el a wordu apunta como coordinador di AVB Academy.

E federacion ta bay cuminsa cu un academia p’e muchanan di U-13, U-15, U-17 y U-20. Lo cuminsa cu e academia na luna di Maart. Den e programa di e academia ta poni cu lo busca e muchanan cu bus, nan lo haya huiswerk begeleiding y training nan intensivo.

E programa di e academia ta uno completo p’e muchanan den 2 diferente districto. “Nos ta bezig ta selecciona e 2 districto nan”, asina David Abdul a indica. E lo ta algo grandi, algo nobo p’e muchanan. David Abdul ta encarga pa coordina tur esaki p’e academia.

Aparte di ta coordinador di e academia, despues di e bon noticia ku Aruba su seleccion di U-20 mester representa nos isla, David Abdul ya caba ta druk bezig cu e seleccion Nacional di Aruba U-20. E seleccion lo bay hunga na Juni proximo den e campeonato 2020 Concacaf Men’s U-20 na Merca. Aruba a cay den e poule cu Mexico, Canada y El Salvador. El a indica cu e poule aki ta uno dificil pero e ta trahando riba e voor selectie di esey y ta cla caba.

Den e proximo dianan lo manda esaki, unda ta haciendo invitacion na e clubnan pa splica nan tocante e seleccion U-20. E hungadonan lo haya nan invitacion, tambe conhuntamente ta haci e staff planning, cua ta e staff pa atende cu e seleccion, e coach cu lo bay cun’e, e assistant coach, keepers trainer, conditie trainer y team manager. Den e prome siman nan di trabou, David Abdul tabata encarga pa haci tur esaki.

Facebook Comments