‘Football for Friendship’ na Russia

Despues di un ceremonia di despedida cu un deseo di bon biahe, nos delegacion di Aruba a sali rumbo pa Moscow-Russia.

Diahuebs atardi nos young ambassadors Sheqayli Ascencion y Jahmani Eisden hunto cu coach Edgar ‘Gachi’ Erasmus y Monique Ras hefe di e delegacion, a sali rumbo pa Russia. Durante un ceremonia na nos aeropuerto den presencia di familiars, amistadnan, teamnan di futbol di LIFIDA SV Atletico Santa Fe y FC San Nicolas, representantenan di Arubaanse Voetbal Bond, Sr. Richard Dijkhoff President di Arubaanse Voetbal Bond a hiba palabra y desea nos young ambassadors un bon biahe y hopi exito na cu nan participacion na e Football for Friendship Children’s Social Program. Tambe a duna un speech e representante di Digicel Aruba Sra. Keyla di departamento di human resources, cu a regala nos dos young ambassadors un smartphone cu un linia, un number di telefon, esaki ta esencial especialmente pa nos young journalist Sheqayli Ascencion pa asina e por comunica apart via su number di Digicel dunando tur informacion di e actividadnan, e eventonan di F4F na nos prensa local y tambe na F4F International Media Press Center. Nos di AVB ta sumamente agradecido na nos compania di telefoon Digicel pa e gesto bunita aki.

Despues di un biahe largo diabierna atardi e delegacion di Aruba a yega Moscow, cansa pero hopi excited nan a yega Russia na unda nan a ser ricibi pa e committee di F4F y diasabra dia 9 di juni nan actividadnan ta cuminsa cu un camp despues sigi pa e F4F World Championship y despues sigui pa e Forum y tambe nan lo ta presente den Luzhniki Stadium na Moscow pa e opening ceremonie di FIFA World Cup 2018.