Presidente Di FIFA, Gianni Infantino, Satisfecho Cu Plan Strategico Di AVB

Recientemente a invita Presidente di AVB, ing. Richard Dijkhoff pa un reunion na Zurich cu Presidente di FIFA, Gianni Infantino. Ey a elabora riba e desaroyonan positivo tumando lugar na Aruba den e deporte Rey, esta futbol.
Esaki despues cu e Presidente di FIFA a tuma nota cu AVB t’e prome pais den Caribe cu a entrega un “plan strategico”. E tabata kier a scucha di e Presidente di AVB mes dicon a hinca e plan den otro y pa un splicacion mas amplio di e vision pa desaroya futbol na Aruba.

Un di e topiconan cu mas a hala su atencion den e plan tabata e “Youth Development Program” cu ta trahando riba dje. El a haci hopi pregunta y a expresa cu FIFA ta evaluando pa por produci un “blueprint” pa mira con por implementa e mesun plan aki den henter Caribe.

Locual sin duda a sali for di e reunion aki t’e intencion di FIFA pa yuda AVB implementa su plannan.
FIFA ta hopi contento cu e direccion cu AVB ta hibando futbol na Aruba. Ey Richard Dijkhoff di AVB a haya un bon oportunidad pa por a splica Gianni Infantino di FIFA riba e cambionan cu ta introduciendo den e campeonato di futbol infantil.

Pa prome biaha den historia di futbol di Aruba den categorianan U-5 y U-7 lo no tin un competencia sino mas bien “voetbal dagen”. E cambio aki ta basa riba e filosofia cu lo introduci pa futbol di Aruba. Un filosofia cu ta basa riba e vision di KNVB di Hulanda. A scoge p’e vision di KNVB pa motibo cu nan ta yudando AVB cu coaching courses, TC-4, TC-3, TC-2 y TC-1. Aruba no por conta riba sosten y colaboracion di KNVB di Hulanda si no ta preparando nos coachnan a base di e vision di KNVB y implementa un otro filosofia den futbol.

AVB a informa e Presidente di FIFA tambe cu Congreso di AVB a aproba e relato financiero di aña 2017. Presidente di FIFA a priminti cu den e luna di october un delegacion di e Departamento di Finansa di FIFA lo ta na Aruba pa hunto cu e accountant externo di AVB, traha riba un modelo financiero nobo pa Aruba. Cu esaki AVB lo ta un di e prome federacionnan den Caribe pa cumpli cu e exigencianan financiero nobo.