Resultado positivo pa AVB despues di reunionnan cu FIFA

FIFA ta contento cu AVB ta prome pais den Caribe pa entrega un plan strategico!

Arubaanse Voetbal Bond (AVB) a ricibi bishita di tres  representante diFédération Internationale de Football Association (FIFA) y pa dos dia largo a tene reunionnan interno pero tambe cu Gobierno. AVB ta satisfecho cu e resultado di e reunion, specialmente cu e team di FIFA a bin den un periodo hopi cortico despues di a ricibi e plan strategico cu directiva di AVB a aproba recientemente.

FIFA a mira ki direccion AVB kier bay cu e federacion di futbol local. E entusiasmo cu e plan strategico a crea bou di e team di FIFA, a traduci en un bishita di e ehecutivo mas importante di FIFA pa region Caribense. E ta un persona cu un agenda ocupa, pero a hinca un dia pa Aruba y esey tabata un indicacion cu nan tin Aruba hopi halto riba nan lista di paisnan den desaroyo cu nan futbol. Presidente di AVB, Ing. Richard Dijkhoff, a expresa cu si esey no tabata e caso, nan no lo a haci nan esfuerso pa ta presente.

E reaccion ricibi ta mustra cu e federacion ta bayendo bon, desaroyando futbol riba diferente tereno. A repasa detayenan, condicionnan, kico AVB y FIFA mester cumpli cu nan. Esey ta duna e confiansa pero tambe e perseverancia pa continua, pa motibo cu esaki ta loke e federacion ta haci pa futbol. Trece hendenan cu si ta kere den nan, pero tambe ta sostene nan pa ta hunto, pa forma parti di e team y desaroya futbol na Aruba.

AVB tabata contento cu e bishita di Veron Mosengo-Omba, Director di Desaroyo pa Africa y Caribe na FIFA, di Marlon Glean, Manager regional di FIFA y di Stacy Lewis-Daniels, Senior Manager FIFA Development, pues a probecha di biaha pa sinta cu Minister Dangui Oduber di Turismo, Salud Publico y Deporte. A presenta un plan cu ta trahando riba dje pa varios luna caba, pa incorpora futbol den scolnan di Aruba, asina ing. Richard Dijkhoff a expresa. Conhuntamente cu Gobierno y FIFA a mira con pa yega na palabracionnan. Ta desea pa na final firma un MoU cu Gobierno, den cual ta determina responsabilidad di cada partido y a base di e acuerdonan haci, implementa e proyecto aki na scolnan di Aruba. Pa AVB, e bishita di FIFA tabata uno fructifero pa futbol y Aruba.

Aruba ta e prome pais den region cu a entrega plan strategico basa riba e ciclo 2018-2022. Door di entrega esaki, Aruba ta cana dilanti den e region. Hopi biaha a tende cu Aruba su futbol ta atras, federacion ta atras y tur cos ta atras. Pero cu FIFA a bisa cu Aruba ta prome den region di haci algo asina aki, e ta un señal cu e federacion ta riba un bon caminda. E intencion di e proyecto cu AVB ta trahando pa yega na dje hunto cu Gobierno pa incorpora futbol cu scol, ta haci Aruba e prome pais pa logra esaki den Caribe. “Ora cu nan ta bisa Bo cu nos ta un di e prome cu ta cumpliendo cu e exigencianan di FIFA, mi ta kere esey pa nos como federacion ta un reconocimento di e trabounan duro cu nos ta haciendo”, asina Ing. Richard Dijkhoff a expresa cu un sentido di orguyo riba su cara.

Tur esaki ta señal cu ta bayendo riba e bon caminda, pasobra tin cooperacion di FIFA y Gobierno. Pronto lo yega unda tur hende kier yega cu futbol, pero ta algo cu ta rekeri tempo, perseverancia, pasenshi y specialmente confiansa. AVB tin e confiansa di FIFA, pasobra si no tabatin esaki FIFA no lo a manda e persona di mas importante di region den un periodo cortico. Esaki ta un indicacion pa AVB sigui haci e trabounan cu ta haciendo na e momentonan aki.