Ta Dedica Campeonato 2019/2020 na Joseph “Cheppy” Ras: Cheppy A Gana Copa Antiano Cu RCA

E aña aki Arubaanse Voetbal Bond ta dedica e campeonato di futbol Division Honor 2019/2020 na Joseph “Cheppy” Ras, kende a hunga futbol pa hopi aña. El a hunga desde 1960 te cu 1964 como delantero di Lucky Star di Rooi Bosal prome den B-Klasse y despues A-Klasse.

Despues di e campeonato 1963/1964 el a bay hunga p’e Tricolornan di Solito, esta RCA. E prome campeonato di Cheppy Ras cu RCA tabata na 194/1965 y el a bira e maximo goleador di Tricolor cu cu 9 gol. El a yuda RCA titula como campeon despues di 5 aña.

Den e luna di juni di e aña ey el a hunga den Copa Antiano cu participacion di RCA, e sub campeon di Aruba, Tropical di Tanki Leendert, e campeon di Corsou Scherpenheuvel y e sub campeon Jong Holland.

E campeonnan RCA y Scherpenheuvel a topa otro dia 26 di juni 1965 den un wega culminante pa mira kende lo gana of si e wega keda tabla lo tabatin un triple empate na prome lugar hunto cu Jong Holland.

Den Wilhelmina Stadion cu tabata yen di fanatico, Cheppy Ras a score su prome gol na di 4 minuut y e di dos na 24 minuut. Asina aki RCA a bay cu e victoria y bira e prome club di Aruba cu a gana un Copa Antiano.

Dia 18 di juli di e mesun aña, Cheppy Ras a debuta cu e seleccion di Aruba pa hunga contra Valencia FC di Venezuela. Despues dia 11 di augustus el a hunga contra e famoso team di Arsenal di Inglatera y a score un di e dos gol di Aruba.

Cheppy Ras a hunga den luna di october contra Bonaire y Corsou.

Na aña 1966 el a forma parti di e seleccion di Antias, cual tabata forma pa hungadornan di Aruba y uno di Bonaire. Nan a gana e medaya di plata den e Weganan Centro Americano y di Caribe na San Juan, Puerto Rico. Durante e campeonato aki e seleccion di Antias a perde solamente 1 wega y tabata contra Mexico.

Cheppy Ras a bolbe bira campeon cu RCA na 1968, na 1969 sub campeon y den ambos Copa Antiano. El a hunga 3 campeonato mas cu RCA y a retira despues di e campeonato 1971/1972, pero a bolbe hunga un campeonato mas na 1975. El a participa den 9 campeonato cu RCA den hoofdklas y a anota 32 gol.

Facebook Comments