Ta propone un partnership entre Gobierno, AVB y FIFA – AVB mes kier maneha su facilidad deportivo – FIFA ta garantisa fondo adicional pa renobacion y mantencion

Recientemente tabatin un delegacion pisa di e organisacion “Fédération Internationale de Football Association” (FIFA) riba nos isla pa topa cu Presidente di Arubaanse Voetbal Bond (AVB), esta ing. Richard Dijkhoff.

Meta di e reunion tabata pa repasa e plan strategico cu AVB a presenta, como e prome pais den e region aki. Di nan banda FIFA a mustra interes pa extra sosten na Aruba, den forma di programanan special pa muchanan na scol.

Sinembargo, un di e retonan cu constantemente AVB ta confrontando ta cu facilidad pa practica futbol. Te awor AVB mes no ta dispone di ningun facilidad, cu ta haci nan dependiente di otro fundacionnan pa mantene e facilidad.

Recientemente CONCACAF a bin Aruba y no a aproba e facilidadnan pa tene wega internacional, cu a causa cu mester a biaha pa Corsou pa hunga ayanan. E gastonan adicional aki tabata inecesario si nos facilidadnan tabata na ordo.

Kisas tin un pensamento eroneo cu FIFA ta manda placa pa AVB pa mantencion di facilidad deportivo. Esey no t’e caso, pasobra FIFA no ta inverti den facilidadnan cu no ta di nan.

Cu e realidad aki riba mesa y mirando e retonan cu e fundacion cu mester mantene e facilidadnan ta confrontando y banda di e hecho cu aworaki ta compartiendo e mesun facilidad cu varios otro organisacion, a bin n’e idea pa AVB/FIFA haya nan mesun facilidad.

E representante di FIFA a expresa na Minister di Deporte, Dangui Oduber, di e idea pa Gobierno pasa un di e facilidadnan directamente bou maneho di AVB.

Kisas den un “lease” di duracion largo, den cual AVB y FIFA ta garantisa cu ta aloca fondo adicional pa renoba e stadion na normanan internacional di futbol.

Tambe lo garantisa un plan di mantencion durante tur e añanan cu ta “lease” e propiedad.

Di e forma aki Gobierno no tin gasto mas di mantencion y futbol ta adkiri un facilidad pa garantisa mas training y weganan henter aña.

E plannan concreto riba mesa awor, cu lo conta cu sosten financiero di FIFA, si Gobierno compromete na sostene e proyecto, ta encera pa inclui futbol den nos scolnan.

E proyecto aki te ainda no a cuminsa den e region aki, pues si Gobierno bay di acuerdo, Aruba lo bira pionero den henter Caribe pa hinca e deporte rey den cura di scol.

Pa Gobierno e lo traduci den promocion di mas movecion y deporte den scol, pero pa AVB e lo nifica preparacion y creacion di mas futuro futbolistanan.

Arubaanse Voetbal Bond, cu ta conta cu un bon relacion cu CONCACAF di nos region, cu KNVB di Hulanda y cu FIFA na nivel mundial, ta cla pa hiba futbol di Aruba n’e siguiente nivel di desaroyo y crecemento.

A dura hopi aña di preparacion, di anticipacion y di creacion di e plan strategico. Awor cu tur cos ta cla y aproba, ta wardando e compromiso di Gobierno pa hunto cu FIFA start e proceso di ehecucion.

Leave a Reply